(ខេត្តកណ្ដាល) ៖ ជារៀងរាល់ថ្ងៃនេះកាស៊ីណូមួយដែលមានឈ្មោះថា «ដាយអឹមិនស្ដូន» ស្ថិតនៅតាមខ្សែបន្ទាត់ព្រំដែនកម្ពុជាវៀតណាម ក្នុងភូមិព្រែកស៊ឹង ឃុំក្អមសំណ ស្រុកលើកដែក ខេត្តកណ្ដាល ត្រូវបានគេទម្លាយថា បានបើកឲ្យប្រជាពលរដ្ឋខ្មែរចូលលេងជារៀងរាល់ថ្ងៃយ៉ាងគឃ្លើនតែម្ដងមានទាំងល្បែងបញ្ជាល់មាន់ បៀ អាប៉ោង និងយូគី ខុសនឹងគោលការណ៍របស់រាជរដ្ឋាភិបាលកម្ពុជា ដែលបានហាមមិនឲ្យប្រជាពលរដ្ឋខ្មែរប្រព្រឹត្តអំពើលេងល្បែងស៊ីសងនោះទេ នេះបើយោងតាមប្រភពព័ត៌មាន ដែលអង្គភាពយើងខ្ញុំទទួលបាន នៅថ្ងៃទី០៦ ខែមករា ឆ្នាំ២០២៦នេះតែម្ដង។
យោងតាមប្រភពព័ត៌មានពីប្រជាពលរដ្ឋ បានថ្លែងប្រាប់អង្គភាពយើងខ្ញុំឲ្យដឹងថា៖ កាស៊ីណូ «ដាយអឹមិនស្ដូន» បានបិទផ្លាហាមប្រជាពលរដ្ឋខ្មែរកុំឲ្យមានការចូលលេង ប៉ុន្ដែតាមពិតកន្ទេលធំបន្លំដេកតែប៉ុណ្ណោះ គ្រាន់តែបិទបាំងភ្នែករបស់សាធារណៈជនថា ទីតាំងរបស់ខ្លួនបានអនុវត្តត្រឹមត្រូវតាមផ្លូវច្បាប់ អ្វីដែលផ្ទុយពីការពិតគេបានបើកឲ្យជនជាតិខ្មែរចូលលេងយ៉ាងសេរីតែម្ដង។ ជារៀងរាល់ថ្ងៃមានប្រជាពលរដ្ឋខ្មែរច្រើនជាងជនជាតិវៀតណាមទៀត បើថ្ងៃសៅរិ៍ ឬអាទិត្យក៏សំបូរអ្នកលេងច្រើនណាស់ដែរ នាពេលកន្លងមកម្ចាស់កាស៊ីណូមិនត្រឹមតែមិនស្ដាប់ការណែនាំរបស់ថ្នាក់ដឹកនាំរាជរដ្ឋាភិបាលនោះទេ បែផ្គើនដោយផ្ទុយនឹងផ្លូវច្បាប់បែបនេះសោះ។
ចំណុចត្រង់នេះហើយ ដែលគណៈកម្មការគ្រប់គ្រងល្បែងពាណិជ្ជកម្មកម្ពុជា គួរបើកការស្រាវជ្រាវស៊ើបអង្កេតរឿងនេះឲ្យបានម៉ត់ចត់ បើរកឃើញកំហុសគួរតែចាត់វិធានការណ៍ឲ្យបានម៉ឺងម៉ាត់ជាទីបំផុត ព្រោះថា ច្បាប់បានហាមឃាត់ទៅហើយ ហេតុអ្វីម្ចាស់កាស៊ីណូ «ដាយអឹមឹនស្ដូន» នៅតែផ្គើនមិនស្គាល់ច្បាប់ទម្លាប់បែបនេះ។ ម្យ៉ាងទៀត តាមការអះអាងរបស់ប្រជាពលរដ្ឋក៏អាចដឹងថា ម្ចាស់កាស៊ីណូ ជាមនុស្សមានអំណាច ឬអ្នកមានអំណាចនៅពីក្រោយទើបអាចធ្វើអ្វីបានតាមអំពើចិត្តតែម្ដង ដោយបណ្ដែតបណ្ដោយឲ្យមានការបើកល្បែងយ៉ាងគំហុក តួយ៉ាងដូចជា៖ ល្បែងបញ្ជាល់មាន់ បៀ អាប៉ោង និងយូគី ដែលសុទ្ធសឹងបម្រើឲ្យប្រជាពលរដ្ឋខ្មែរជាអ្នកលេង។
បញ្ហានេះផងដែរ អង្គភាពយើងខ្ញុំ មិនអាចទំនាក់ទំនងទៅម្ចាស់កាស៊ីណូ «ដាយអឹមិនស្ដូន» បាននោះទេ ដោយគ្មានលេខទូរស័ព្ទទំនាក់ទំនង។
បើទោះបីជាយ៉ាងណាក៏ដោយ អង្គភាពយើងខ្ញុំនឹងរងចាំមើលថា គណៈកម្មការល្បែងពាណិជ្ជកម្មកម្ពុជា និងលោក គួច ចំរើន អភិបាលខេត្តកណ្ដាល ព្រមទាំងលោកឧត្តមសេនីយ៍ទោ ឈឿន សុចិត្រ ស្នងការនគរបាលខេត្តកណ្ដាល នឹងចាត់វិធានការណ៍បែបណាចំពោះកាស៊ីណូដែលកំពុងប្រព្រឹត្ដផ្ទុយពីច្បាប់ខាងលើនេះ។ អង្គភាពយើងខ្ញុំនឹងរងចាំការបំភ្លឺពីគ្រប់ភាគីពាក់ព័ន្ធទាំងអស់នៅរៀងរាល់ម៉ោងធ្វើការ សម្រាប់ព័ត៌មានលំអិតយើងខ្ញុំនឹងផ្សាយនៅវគ្គបន្ទាប់៕
.jpg)
.jpg)
.jpg)
.jpg)
.jpg)
.jpg)
