តម្លៃប្រេងអន្តរជាតិធ្លាក់ចុះគំហុក ក្រោម ៨០ ដុល្លារ/បារ៉ែល ជុំវិញកិច្ចព្រមព្រៀងសន្ដិភាពអាមេរិក-អ៊ីរ៉ង់

 

 

តម្លៃប្រេងអន្តរជាតិ​បាន​បន្តធ្លាក់ចុះគំហុកដល់ក្រោម ៨០ ដុល្លារ/បារ៉ែល ពេលបិទការជួញដូរកាលពីថ្ងៃអង្គារ ដល់កម្រិតទាបបំផុតក្នុងរយៈពេល ៣ ខែ ជុំវិញកិច្ចព្រមព្រៀង​បញ្ចប់សង្រ្គាមរវាងសហរដ្ឋ​អាមេរិក និងអ៊ីរ៉ង់ ដែលនឹង​ឈានទៅដល់ការបើកច្រកហ័រមូហ្សឡើងវិញ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។ ​

តម្លៃប្រេង ម៉ាក Brent បាន​ធ្លាក់ចុះ ៤,២១ ដុល្លារ​ ឬ ៥,១% ដល់ ៧៨,៩៦​ ដុល្លារ/បារ៉ែល ដែលជាអត្រាតម្លៃទាបបំផុតរាប់តាំងពីថ្ងៃទី ២ មីនា ខណៈតម្លៃប្រេងអាមេរិក WTI ឯណោះវិញ បានធ្លាក់ចុះ ៤,៧០ ដុល្លារ ឬ ​៥,៨% ដល់ ៧៦,០៥ ដុល្លារ ទាបបំផុតរាប់ពីថ្ងៃទី ៤ មីនា។ ​

តម្លៃប្រេងទាំង២ នៅតែខ្ពស់ជាងតម្លៃមុនពេលសង្រ្គាមផ្ទុះឡើងនាថ្ងៃទី ២៨ កុម្ភៈ។ ​

អ្នកជំនាញទីផ្សារបាន​លើកឡើងថា តម្លៃប្រេងធ្លាក់ចុះគឺដោយសារតែការរំពឹងទុកពីការបើកច្រកសមុទ្រហ័រមូហ្សឡើងវិញក្រោយអាមេរិក និងអ៊ីរ៉ង់ ព្រមព្រៀងគ្នាលើកិច្ចព្រមព្រៀងបញ្ចប់សង្រ្គាមបឋម ទោះបីជាពាណិជ្ជករនៅតែប្រុងប្រយ័ត្នពីព័ត៌មានលម្អិតនៃការស្រុះស្រួលរវាងភាគីវិវាទទាំង២ក្ដី។ អ្នកវិភាគទីផ្សារម្នាក់ប្រាប់រ៉យទ័រ តម្លៃប្រេងអាចនៅតែប្រែប្រួល ដោយឡើងចុះ ១០ ដុល្លារ លើ ឬក្រោម ៨០ ដុល្លារ/បារ៉ែល។

កាលពីថ្ងៃអង្គារ លោកប្រធានាធិបតីអាមេរិក ដូណាល់ ត្រាំ បាន​ឱ្យដឹងថា សំណើនៃកិច្ចព្រមព្រៀងនឹង​ហាមអ៊ីរ៉ង់ពីការអភិវឌ្ឍអាវុធនុយក្លេអ៊ែរ ប៉ុន្តែនឹងបើកឱ្យអ៊ីរ៉ង់លក់ប្រេងទៅកាន់ទីផ្សារអន្តរជាតិ ខណៈពន្យារពេលបទឈប់បាញ់បច្ចុប្បន្ន ៦០ ថ្ងៃ ហើយបើកច្រកហ័រមូហ្សឡើងវិញ។ ទោះបីបែបនេះក្ដី អ្នកជំនាញនៅតែព្រមានថា ការដឹកជញ្ជូនទំនិញ និងការនាំចេញថាមពលពីមជ្ឈិមបូព៌ា អាចនឹង​ត្រូវការពេលច្រើនសប្ដាហ៍ ដើម្បីត្រឡប់ទៅដូចដើមវិញ។

យ៉ាងណាមិញ មានកត្តាមួយចំនួនផ្សេងៗទៀតដែលអាចឱ្យតម្លៃប្រេងមាននិន្នាការធ្លាក់ចុះ ដោយរួមបញ្ចូលទាំងកង្វល់ស្ដីពីសេដ្ឋកិច្ចចិន កំណើនអតិផរណា និងអត្រាការប្រាក់សកល និងការអំពាវនាវរបស់អាមេរិកឱ្យបញ្ចប់សង្រ្គាមរុស្ស៊ី-អ៊ុយក្រែន ជាដើម៕ ​